Part IV Incubus
As nation first tae welded rise
Frae tribal wars where Freedom dies
An tyrants spurn their victims’ cries
As vultures feed,
There shone neebor England’s eye
A jealous greed.
For as the bells o Freedom toll
The English f’und it hard tae thole
That Scotland played an equal role
In wordly things,
An planned tae hae a Ragman’s Roll
For Scottish Kings.
Chance came at last tae England’s aid
As owre the Border William strayed
An Scottish Lion wis waylaid
Tae Scotland’s loss,
For then the ransom Scotland paid
Made Henry boss.
But Richard, for the Third Crusade,
Accepted cash the Scots conveyed
An cancelled deal his faither made;
But seeds were sown,
An England’s future schemes were laid
Frae that day oan.
At Largs the Thistle’s jaggit stings
Brocht vict’ry owre the Viking Kings,
While Kinghorn’s cliffs disaster brings
Mair wae an pain,
For oan a wean the future hings
Tae England’s gain.
For Edward, first o Nazi creed
An Fascist frae his taes tae heid,
As feudal Lord haud then decreed
His glaikit son
Wid wed the bairn, an then indeed
Wis Scotland won.
But Margaret, the Infant Queen,
Depairted frae the wordly scene
An dee’ed as though she haudnae been
In Kirkwall Bay,
Wi Edward fit tae burst his spleen
His scheme astray.
Till Regents, tae King Edward’s glee.
Their rotten creed “Look efter me”,
Made Edward Scotland’s referee
In Royal quest;
Though Edward’s choice wid shairly be
For England best.
No for the first time nor the last
Withoot the people bein asked,
Wis Scotia rendered tae the blast
That Fates betide,
When Leaders for ain fortunes cast
Their pride aside.
They sacrificed for selfish gain
Tae rule as pairt o Edward’s reign,
An Edward mad an half insane
Wi bluidy lust;
Tae hae aw Scotland for his ain,
Resistance crushed.
Scotland Forever: A History in 10 Parts
Part I In the Beginning
Part II Crime an Punishment
Part III Conception
Facebook page for Christie Grahame